جوابات

عارفه!
من احلامى اللى انا شايفه انها بسيطه
انى امسك التليفون فى اى وقت واطلب نمرتك فيجينى صوتك على الناحيه التانيه بسرعه ..ممكنش ميحصلش ده فى اى وقت
بس على الاقل حيبقى افضل من دلوقتى
ساعات كتير بالليل بشتاق انى اتكلم معاكى او احكيلك على اى حاجه
او اكلمك ارغى معاكى وانا قاعده تحت شباك اوضتى زى مابعمل مع كتير من صحباتى
انى عارفه انى بحب الليل
وبحب الرغى تحت الشباك بتاعى
الشجر اللى تحت الشباك كبر اوى اوى....فى الاول كنت فرحانه بلونه الاخضر وشكله المبهج وفرع الاوكسجين اللى بقا جنب الشباك
بس الشجره كبرت زياده وابتدت تاخد مساحه من البراح اللى قدامى وانا على السرير...........حتى البراح ده  فى جزء منه اختفى او على الاقل ابتدى!
مفتقداكى....وتصبحى على خير